يا إخوان دخلنا عليكم بالله واش ميمكنش نهظروا على شي فريق مغربي ولا شيء خبر على البطولة ديالنا وانديتها ولاعبيها،، واكون فيه الهدوء والاحترام بلا تعصب مبالغ فيه والسب والشتم،، وغريب هاذ الشيء وتتنشر اعباد الله خبر عادي تينوضوا ادابزوا فيه.

ولا ديك الاخبار ديال الوداد والرجاء ديما شابكينها والسنوات الاخيرة زاد هاذ الشيء وجماهير كاع الاندية الكبيرة فالمغرب، وقليل فين تنلقى جوج تيشجعوا جوج اندية مختلفة اتناقشوا بهدوء شحال من مرة تيبداو بخير تيساليو بالسبان ومنين تتقول هذوا هناونا من الدباز ودايرين عقلهم تيجي واحد اخر تيشجع ديك الفرقة تيدخل اشعلها وتترون.

شكرتي شي فرقة تتولي مشجع ديالها بيه فيه، انتقدتي شي فرقة صافي كفستيها هظرتي فالمقدسات واحيانا تتولي مشوش ومحساد وووو وكاين اللي معارفكش تينوض احكم عليه من منشور على الكرة، وراه بزاف هاذ التعصب معرفت منين جاء هاذ الشيء وكاين شي وحدين هذه مهمتهم اشعلوها وارجعوا اللور.

ولينا تنخافوا نهظروا على الفرق المغربية وبعدنا منها لسبب واحد لان منين تترون شحال من مرة خرج داكشي للشارع وشي تيتعرض لشي والحسابات والقتيلة، والله ايلا هاذ الشيء بزاف، لنفترض كاع المنافس تيشد فالانصار لخرين بذكاء واحترام فين المشكل بنادم اضحك واوسع قشابتو وشد فيا نشد فيك باحترام وروح رياضية.

لاش عاطين لهاذ الكرة اكثر مما تستحق وشحال من واحد تيتعصب على الكرة كثر من عرضه وشرفه وتيبقى اسب الوالدين والاصول على جلدة منفوخة تدارت للترويح عن النفس ومهنة اللي تيمارسوها، والناس اقدر مشجع الخصم اتفرج وسط مشجعي الفريق المضيف متيهظر معه احد.

وبعض المرة تتشوف اللاعبين براسهم تيساهموا في شحن الاجواء بسبب تصرفاتهم الصبيانية وتينظم ليهم شي وحدين من الجمهور، على برى تيتسالي اللقاء غالبا تتشوف اللاعبين شي تيسلم على شي واتبادلوا القمصان واسلموا على الطاقم التحكيمي وانصرفوا بحالهم استعدوا للقادم من المواعد.

وراه بزاف هاذ الشيء اللي تينوضوا على الكرة المغربية ومن اقسى واسوء ما رايت مشجعين ديال واحد الفرقة دارو كصيدة ووحدين فحالة خطيرة وواحد من الخصم دار منشور اتمنى ليهم الشفاء وشي وحدين فالتعاليق بقاو عليه لا واش نسيتي اش دارو نهار الفلاني تيهظر على اللاعبين هو وولى عندو كاع اللي فديك الفريق عدو وميكرهش اموت كاع،، هاذ الشيء راه ميدخلش العقل اعباد الله وعيب وعار.

https://www.facebook.com/ouanna.belaid10/posts/10216361431001685

Facebook Comments

Post a comment