اليوم غانهضروا على واحد البلان ماكاينش شي حد فالعالم ماكيستعملوش.. ولكن معظم الناس لي كيستعملوه ماعارفينش كيفاش كيخدم.. ولي هو الطيليفون وبالضبط غانهضروا على الإتصالات يعني ليزابيل.. كلكم كظلوا وتباتو تهضروا مع واليديكم ومع الساطات ديالكم.. كأنكم حداهم.. واش عمرك تساءلتي كيفاش كيخدم هاد العجب.. انا فالرباط ونقدر نهضر مع واحد فمراكش.. اااو وايلي والهضرة هي نيت كتوصل كيفما كنقولها وفظرف وجيز.. !! طبعا كاين فيكم لي راودوا هاد السؤال.. ولكن مالقاش ليه تفسير..
اجي تفهم وتاخذ نظرة عامة على هاد العجب المتعجب..
الفكرة دياال الاتصالات بين الاشخاص سواء كانو بعاد ولا قراب يعني داخل المدينة او خارجها او حتى بين قارة وقارة.. هي فكرة صغيرة تطورت.. مؤخوذة من الطالكي وولكي هذاك راديو لي عندو لونطين كيكون عند سيكيريطي ولا البوليسي وكيبقى يهضر فيه.. هذاك الراديو كيخدم داخل واحد الشبكة صغيرة.. ماكيفوتش كيلمترات محددة.. يعني الى خرجتي على المسافة المحددة ماغاتبقاش متاصل مع الراديوات الاخرين.. زائد هاد الراديو نوع القنوات المستخدمة فيه أحادية.. شنو كيعني هادشي اخاي سيمو تا اش دخلنا لشي قنوات ياك كنا فالراديو هههه تا غا بلاتي اصاحبي مالك. ماتمشيش بعيد ودوخ را عادي.. قصدت بها زعما هاد الراديو لي هو الطالكي وولكي ملي كيكون بين جوج دالاشخاص.. خاص غير واحد لي يهضر علاش كتلقى البوليسي كيورك على ديك البطونة ويهضر ويقول فالاخير كلمة حول .. باش كيعطي الاشارة للاخر يهضر وكيقولو صافي راني ساليت هضرتي يالاه هضر نتا دبا.. بخلاصة هاد أحادية يعني عند الحق غير واحد يهضر.. ملي كيهضرو بجوج دقة وحدة كيوقع واحد التشابك والتخالط وكيتخربق الخط وتا حد ماكيسمع لاخور اش قال.. لكن فالاتصال ديال الهواتف عندو قنوات ثنائية.. داكشي علاش ملي كتكون كتهضر نتا وشي حد فالطيلي وكتشبكوها كتبداو تهضروا بجوج دقة وحدة.. وهو كيبقى يقولك وتا غا سمعني اصاحبي وخليني نهضر وسمعني ونتا كتبقى تقولو وماتهضر معايا مانهضر معاك ههههه غا كمثال وصافي.. وفالاخير را اصواتكم بجوج كيتسمعوا.. ماغانزيدش ندوخكم بهاد القنوات وغاندوزو نشوفوا الخدمة ديال الاتصالات كيفاش كتكون..
فكل مدينة كيكونو بزاااف ديال الابراج لي كنسميوهم حنى الريزوات (ديال اتصالات اينوي اورونج) ملي كتخرج لشي عروبية بعيدة كتقول وماعنديش الريزو.. انا ماغانهضرش بمصطلحات علمية باش مادوخوش وغانمشي معاكم غا على قد معرفتكم..
المسألة هنا كاملة دايرة على موجات الراديو.. والحمدللخ كلكم قااريين ملي كتسمعو الموجات والتردد او حاجة كتمشي لبالكم هي الفيزيك وبالضبط وحدة القياس ديال الـ Mhz و Ghz هاا حتى لدبا مزيان ولينا كنفهموا علاياش داير البلان.. طبعا لكل موجة تردد ديالها.. وموجات الاتصالات حتى هي عندها ترددات طبعا..
ندوزوا لشنو كيوقع ملي كدوز لابيل لشي شخص فين ما كان.. وحنى نبقاو غا فالمغرب مانهربوش.. هنا كتجي واحد اللعيبة سميتها SID هاد تويشية كتكون فأي هاتف وكتكون أيضا فأي شبكة اتصال (اينوي اتصالات اورونج..) هاد SID هو نقطة التواصل بين الهواتف والشبكات.. مثلا نتا مخدم شريحة اتصالات المغرب (كارطة دياال اتصالات) كتدوز لابيل لشي نمرة كيف ما كانت.. كينوض هاد الـ SID ديال طيليفونك كيبدا يقلب على SID ديال اتصالات.. طبعا الى كنتي داخل المدينة لي عامرة ريزوات را كيلقاها وملي كيلقاها.. كتنوض واحد اللعيبة اخرى ثاني سميتها الـ MTSO لي كتتبع المكان ديال الهاتف ديالك وكيبدا يقلب على نمرتك فلاباز دوني ديالها (قاعدة البيانات) كتلقى أن نمرتك مسجلة عندهم وكتدوز لابيل للنمرة لي نتا باغي.. وعوتاني كيوقع نفس البلان مع هذاك لي باغي تعيط ليه.. الى كان داخل المدينة وعندو الريزو راه كتوصلوا لابيل وكتبداو تهضروا.. هنا اشنو كيوقع لهضرتكم !!
كتهضر نتا كتمشي هضرتك على شكل موجات وكتمشي مقسمة وكتوصل للقمر الاصطناعي لي خاص بالاتصالات وعوتاني هو كيقلب على داك الشخص لي نتا كتهضر معاه وكيحول ليه الهضرة ديالك ويصيفطها ليه وكولشي هادشي فظرف ربع ثانية !! تخيل نتا السرعة لي كيمشي بيها هادشي..
كمعلومة اضافية الاتصالات اللاسلكية كتمشي عبر الموجات وكتلتاقط عبر أقمار اصطناعية وهاد الاقمار الاصطناعية راه هي لي متخصصة فالاتصالات وفالقنوات ديال ساطيليت يعني البارابول وايضا فالتعرف على احوال الطقس.. وكاين شلااا اقمار اصطناعية..
اما الموجات السلكية لي هي ديال الهاتف الثابث فهاذي كامشي عن طريق الكابلات لي تحت البحر أو الكابلات لي كتكون معلقة فالشوارع..
وحاليا كاينة واحد التقنية لي كلكم كتشوفوها ولي هي GSM هاذي التقنية لي خدام بها العالم بخصوص الاتصالات اللاسلكية ولي كتخدم بواحد التقنية اسمها TDMA والتردد ديالها كيتراوح ما بين 900 MHz الى 1800 MHz فمعظم دول العالم.. ومن 900 MHz الى 1900 MHz فامريكا.. زائد هاد التقنية كتعتامد على التشفير ديال المعلومات وكيحميها..
واخر تقنية خرجات هي WCDMA هاد التقنية لي تجمع فيها الاتصال والانترنت وكتوصل فيه سرعة نقل البيانات الى 2 ميگا فالثانية..
كنظن هادشي لي كاين.. حاولت نشرح فيه هاد اللعيبات.. نتمنى تكونوا خديتو ولو فكرة صغيرة على هادشي.



Med Ihissou
الديب ويب بالدارجة_deep web bidarija

Facebook Comments

Post a comment