تنظيم وقت النوم

المقال لي سوبريميتو بالغلط :”|
واعدتكم انني غنلوحو اليوم .
بغيتك تخلي اي حاجة ملهي فيها دابا وتبع معايا مزيان الله يحفظك .

راك خاسر لا كنتي كتدور فالويب و كتدخل غا للفايسبوك ولا اليوتيوب ولا الواتساب ولا التويتر ولاباقي مواقع التواصل الاجتماعي وبعض المواقع الاخرى ، نفس الروتين … اليوم جبت ليك شي حاجة سبيسيفيك ، مواقع تقدر تغير الحياة ديالك … منكترش فالهدرة … نبدا

1- موقع TED
هو اختصار لـ 3 دالكلمات ( Technology & Entertainment & Design) .. تكنولوجيا و ترفيه و تصميم .. اش غنقوليك .. اجمل حاجة شفتها فهاد الشبكة العنكبوتية ، حاجة روعة ، حاجة صداع ، منقدرش نتيق انه سنين ونتا كتسورفي فالنت و مكتعرفش هاد الموقع ، باختصار تيد هو عبارة عن منصة ولا مؤتمر كيطلع فيه شي حد متميز عندو فكرة بغا يوصلها عندو خبرة ، قصة ، اختراع ، رسالة مفيدة ، درس بغا يوصلو للناس ، مهارة رائعة فنشر الفكرة بشكل مبسط و مسلي وممتع و فوقت صغير .. الفيديو الكبير مكيفوتش 21 دقيقة .. متخافش غتدوز بزربة بلا متحس , تيق بيا عمري ما دخلت لهاد الموقع و مخرجتش بشي حاجة مفيدة .

اول حاجة ، ملي كتدخل ليه كتلقا 4 دالخانات ( لا كنتي من التيلي دير كليك على Browse all talks بش يخرجو ليك ) ..غتلقى ؛ الموضوع ( علم ، تكنولوجيا ، اعمال ، ترفيه … ) و اللغة (جميع اللغات) والفترة ( كتختار الوقت لي بغيتي فالفيديوهات لي تشوف 0-6 ولا 6-12 ولا 12-18 ولا 18+ دقيقة ) الرابعة ديال الحدث و معندهاش اهمية كبيرة
اختار لي بغيتي و عوم مع راسك فبحر المعرفة و الاستمتاع . 
https://goo.gl/V1t3tx

2- موقع Quora
راه عييب وعاااار انك تكون فالقرن الـ 21 وعندك الانترنت فالدار وتكون عمرك مدخلتي لموقع Quora 
الموقع اسطورة ، حاجة عظيمة ، عقلك يهرب ، هو باختصار تجمع لبزاف دالناس كيسولوا فيه و كيشاركو المعرفة ديالهم ، عدد كبير من الاسئلة فأغلب المجالات كيجاوبو عليها متخصصين و علماء وناس فاهمين فنفس مجال السؤال ديالك
اي سؤال كان طاح ليك عل البال غتلقا ديجا شي حد كتبو ، اسئلة فكل حاجة كل حاجة و اي حاجة كتخيلها

هو بالأنجلش ولكن ايلا فتحتي القاموس قدامك بش تفهم غتضرب عصفورين بحجر واحد و حتى لا عكزتي بش تقلب هاك مجموعة من المواقع الرائعة بش ترجم بيها .
-> [ https://www.facebook.com/photo.php?fbid=1058386967570358&set=a.459233410819053.1073741825.100001971951630&type=3 ]

الموقع عالمي ممكن تلقا ناس من امريكا ، المانيا ، روسيا ، اليابان ، اي مكان .. سوو بلا متستغرب لا جاوبوك .

ملي كتدخل كتختار 10 دالمجالات لي باغي تبعهم بش لا كان شي سؤال من طرف شي حد فمجال نتا مهتم بيه كتطلع ليك notification بلي كاين سؤال ممكن يهمك ، دخل وشوفو .. ممكن تجاوب لا كنتي عارف الاجابة . الموقع … نعيا منكتب عليه منقدرش نعطيه حقو .
https://goo.gl/3JO57M
3- موقع National Geographic 
قناة مكينش لي مكيعرفهاش ، قناة غنية عن التعريف و هي احسن قناة عندي فالتلفزيون كامل .

نفعاتنا فصغرنا ، ملي كيدخل باك على غفلة ، كتقلب الفيلم لي كيكون بادي و كتديرها هي تحت عنوان راه كنستافد ألواليد ههه الله يسمح لينا منهم .

المهم هاد القناة كتعيشك فعالم تاني .. 
الطيارات اللي كيطيحوا و الصندوق الاسود ديالهم ، رحلة مع الصيادين ديال سمك التونة العنيدة كتحس براسك انك عضو من الفرقة ، العاب العقل و الخداع كتفاجئ بالتفسيرات العلمية ديال بزاف دالحوايج لي كتديرها بدون شعور ، عالم الفلك و الجمال ديالو ، عالم المغامرة والجنون ، عالم التكنولوجيا و الاختراعات و التصميمات الابداعية … لابقيت كنهدر عليه تال الصبح مغنكملش.
الموقع فيه كاع البرامج و الصور و الفيديوهات و القوائم .
http://natgeotv.com/ae

4-بغيتي مواقع تقرا فيهم مقالات كتهدر على بزاف دالمجالات و بزاف دالعلوم المختلفة ، كايجيك الملل ملي كتقرا فشي كتوبة و كياخذوا منك وقت كتير – بالنسبة ليا لا كنتي كتقرا كل يوم مقال … فكيغنيك انك تقرا كتاب كامل ، غتسولني علاش ؟ انقوليك ببساطة حيت المقال كيبقى قراءة مبسطة و عصارة فيها تبسيط و ملخص للكتاب نفسو ، مهضوم بلغة واضحة و ساهلة للفهم ، 5 دقايق ديال القراءة تطلع بمعلومات ضخمة بزاف من باب عرف حاجة من كل حاجة .. سوو جبت ليكم احسن المواقع بالنسبة ليا لي وليت كنتفقدها كل يوم بفضل واحد الدري مصري شفتهم عندو .

أراجيك -> http://goo.gl/QeM4gv
معلومات ، بوب ساينس ، اخبار ، علوم ، فن .. موقع رائع بزاف وحافل بالإفادة

مترجم -> http://goo.gl/r76Um2 
موقع زوين ، شبكة اجتماعية بش يترجموا للأعمال الاجنبية و بش ينتجوا المعرفة فنطاق واسع فمواضيع كتيرة من هاالعلوم و بناء الذات و اعمال وصحة …، للأسف المغاربة مكيزوروهش بزاف حد الان سوريا و الجزائر و مصر متصدرين الترتيب فناحية عدد الزوار

نقطة -> http://goo.gl/RFY207
تجمع علمي عربي ، مقالات فالمستوى كتجاوب على بزاف دالتفسيرات بطريقة واضحة وسلسة ، نصحكم تدخلو ليه .

نورني -> http://goo.gl/sKmEXs
موقع مصري ولكن الاجابات والمقالات عربية ، فيه تجارب و خبرات ديال بزاف دالناس ، العنوان بعض المرات كيبدا بسؤال كيف ؟ | إزاي ؟ … دخلوا استافدوا من الاخطاء ديال الناس وخودو النصائح و الدروس من الهدرة ديالهم .

5- موقع ويكي هاو
بطبيعة الحال كلنا مكرهناش نديرو شي حاجة من الصنع ديالنا ، نتا مصاوبها ، تصاوب تيليسكوب تصاوب روبوت تصاوب شي لعبة ، تصاوب ماكلة ، تتعلم ترسم و لا تصاوب التصاور بالفوتوشوب ، بغيتي تدير حوايج بزاف ولكن معرفتيش الطريقة ، حلك عندي 😉

هاد الموقع موسوعة على كيفاش تدير اي حاجة ، ما يقارب 100 الف مقال فالفن و الترفيه ولا الاعمال و لا الصحة ولا فالعلاقات الغرامية ولا فالحياة الاجتماعية ولا … حوايج عمرك مكنتي متوقع الحل ديالهم ، لاكنتي باغي تقلب على شي حاجة معليك غا تبدا السيرتش بـ “كيف” ولا “How to ” وتكمل …
الموقع متوفر ب 60 لغة منهم العربية 
http://goo.gl/c7EUjP
( لا بغيتي الموقع بالعربية شوف الكومنط اللول )

6- موقع الباحثون السوريون ، العلوم الحقيقية ، اخبار العلوم ، هل تعلم ؟ نسخة بالدارجة 
بصراحة كلهم زوينين ، ال 3 اللولين كيجيبو ليك اخر ما وصل ليه العلم من ابحاث و اختراعات و اكتشافات ، اما اللخرة فكترجم و كتفيدك تحت شعار تا الدارجة تقدر تثقفك

فيهم مقالات مترجمة رائعة ، فكاع مجالات الحياة 
حرام تخلي حاجة بحال هادي ، ناس خدموا عقلهم وضيعوا وقتهم باش يترجموا و يصاوبوا مقال و فاللخر ميلقاوش إقبال عليه ولا مندويهاش فيه … يستاهلو والله .

الباحثون السوريون -> http://goo.gl/taiQMf
العلوم الحقيقية -> http://goo.gl/8zwbah
اخبار العلوم -> http://www.scinewsar.com/
هل تعلم ؟ نسخة بالدارجة -> http://www.lsvbdarija.com

7- حاجة طبيعية ملي كتكون عند الحلاق ولا عند الطبيب وكاتبقا تسنى الدور ديالك و الملل قاتلك ، كتشوف دوك المجلات و كتفتح وحدة كتلاقها ديال 2007 ههه قدييمة بزاف و فيها حوايج بايخة وكتسدها تما نيت وكترجعها لبلاصتها … عندي ليك مجلة محترمة .. مجلة تستافد منها وتعرف كتر وتثقف راسك براسك ونتا تحت الكاشة ديالك متكي :”|

مجلة نيتشر العالمية باللغة العربية -> http://goo.gl/y8lG8p
مجلة التقنية اليوم -> http://goo.gl/dQiqKN
———————————–
الله يرحم ليك الواليدين ، طلب صغير ليك … ( غاتخلي هادشي كيما شفتيه و غتدوز عليه مرور الكرام كون على يقين غتكون إهانة ليا ، حيت درت مجهود صغير باش نصاوب ليك هادشي كااامل ) اذن لي بغيت هو تاخذ سااااااعة وحدة ساعة وصاف من الـ 24 ساعة اللي فاليوم دوزها فموقع من المواقع اللي الفوق ، تيقني التغيير الجذري غيوقع على الدماغ و الثقافة و التفكير ديالك على المدى البعيد .
عن تجربة شخصية .
شكراً ليك بزاااااف وبزااااف حيت عطيتيني من وقتك بش تقرا هادشي كامل.

دير ليه Save بش ترجع ليه ملي تكون محتاجو ولا مونسيوني صاحبك بش يقرا معاك ولا دير بارطاجي بش تعم المعلومة .

Share this article

Facebook Comments

Post a comment